Thursday 28 de March de 2024

Afal Ferrolterra organiza en Mugardos unha charla formativa dirixida a familiares e coidadores de enfermos de Alzheimer e outras demencias


“A estimulación cognitiva como terapia fronte á deterioración cognitiva”, é o tema da charla que darán
a próxima semana en Mugardos a directora asistencial de Afal Ferrolterra, Nokia Ríos, e o xerente da
entidade, José Otero. A cita será o venres 17 de setembro ás 17.30 horas no local social de maiores
de Mugardos. A actividade está organizada en colaboración coa concellería de Benestar Social
deste municipio e vai dirixida a persoas coidadoras e familiares de enfermos de alzheimer e outras
demencias. Para participar é necesario inscribirse chamando ao teléfono do Concello de Mugardos 981
470 290 (extensión 2049) ou a Afal Ferrolterra, teléfono 981 370 692.

Nesta charla formativa abordaranse as principais características e síntomas da enfermidade de Alzheimer e outras demencias, así como o modo de afrontar a devandita patoloxía. Tamén se informará sobre as diferentes terapias baseadas na estimulación cognitiva que axudan a atrasar a evolución da
enfermidade e melloran a calidade de vida das persoas afectadas. Por último, explicarase en que consisten os talleres de estimulación que Afal, coa colaboración do Concello, prevé poñer en marcha en Mugardos.

Estes talleres estarán dirixidos a veciños e veciñas afectados de Alzheimer e outras demencias
en fase inicial ou moderada e neles levarán a cabo diferentes terapias para activar, estimular e adestrar
as distintas capacidades e funcións cognitivas das persoas enfermas (percepción, atención,
razoamento, memoria, linguaxe, orientación, etc).

AFAL FERROLTERRA
Afal Ferrolterra é unha organización sen fins lucrativos que xestiona dous Centros de Día Terapéuticos e outros recursos especializados para enfermos de alzhéimer e outras demencias. Na actualidade atende
directamente a máis de 200 persoas afectadas pola enfermidade e dá apoio ás súas familias e coidadores.

Os obxectivos da entidade son: mellorar a calidade de vida dos enfermos de Alzhéimer ou outras demencias e das súas familias; sensibilizar á sociedade e aos profesionais sanitarios acerca da dimensión e impacto socio-familiar da enfermidade de alzhéimer; e promover recursos sociosanitarios que favorezan a autonomía persoal e funcional do enfermo e a súa familia.